మీనం

ఆదాయం–2, వ్యయం–8, రాజపూజ్యం–1, అవమానం–7.

వీరికి గురుడు జన్మరాశిలో సంచారం ఇబ్బందికరమైనా స్వక్షేత్రమైనందున తన ఇంటిని పాడుచేసుకొనక లాభాలు కలుగచేస్తాడు.

అలాగే, శని కూడా మూడునెలల పాటు వ్యయస్థానంలో సంచరించినా సువర్ణమూర్తి కావడం శుభదాయకం.

ఇక రాహుకేతువుల సంచారం కూడా అనుకూలమే.

మొత్తం మీద వీరు గతేడాది కంటే మరింత మెరుగైన జీవనం సాగిస్తారు.

ఆస్తులు, ఇళ్లు సమకూర్చుకోవడంలో మీ నిరీక్షణ ఫలిస్తుంది.

అధిక ఆదాయం సమకూరి ఒక స్థాయికి చేరతారు.

మీ సహాయార్థం వచ్చిన వారిని కూడా ఆదరించి ఖ్యాతి పొందుతారు.

సాహసం, పట్టుదలే ఆయుధాలుగా ముందుకు సాగి విజయాల తీరం చేరుకుంటారు.

ఆధ్యాత్మిక చింతన తారాస్థాయికి చేరుకుంటుంది. ఖ్యాతిగాంచిన వ్యక్తులను కలుసుకుంటారు.

మీ పట్ల బంధువుల్లో అపోహలు, అపార్ధాలు తొలగుతాయి.

మీ వ్యక్తిత్వాన్ని సంఘంలో అందరూ గుర్తిస్తారు.

ఇంట్లో శుభకార్యాలు ఘనంగా నిర్వహిస్తారు. ఈ రీత్యా ఖర్చులు చేస్తారు.

ఉదారస్వభావంతో అందరికీ ఆదర్శప్రాయంగా నిలుస్తారు.

అయితే శని వ్యయస్థానంలో సంచార సమయంలో కొంత ఆరోగ్యం పై ప్రభావం చూపవచ్చు. ఆహారవిహారాదులలో పరిమితులు పాటించండి.

వ్యాపారస్తులు, వాణిజ్యవేత్తలు లాభాలు గడిస్తారు. అనుకున్నదే తడవుగా పెట్టుబడులు సమకూరే సమయం.

ఉద్యోగస్తులు అందరి మన్ననలు పొంది తగినంత గుర్తింపు పొందుతారు. అలాగే, ప్రమోషన్లు కూడా లభిస్తాయి.

పారిశ్రామికవేత్తలు, శాస్త్రసాంకేతిక రంగాల వారు ప్రతిభాపాటవాలను చాటుకుంటారు.

విద్యార్థులు ఉన్నత చదువులకు చేసే యత్నాలు ఫలిస్తాయి.

రాజకీయవేత్తలు ద్వితీయార్థంలో ఉన్నత పదవులు చేపట్టే అవకాశాలున్నాయి.

చిత్రపరిశ్రమతో పాటు ఇతర కళాకారులు అన్ని విధాలా అభివృద్ధి చెందుతారు. ఊహించని అవకాశాలు దక్కవచ్చు.

వ్యవసాయదారులు రెండోపంటపై లాభాలు ఆర్జిస్తారు.

పరిహారాలు.. విష్ణుసహస్రనామ పారాయణతో పాటు, నిత్యం హనుమాన్‌ ఛాలీసా పఠనం మంచిది. అలాగే, చండీపారాయణ కూడా ఉత్తమం.

అదృష్ట సంఖ్య -3.